Jismoniy madaniyat

Jismoniy madaniyat ta’lim yo‘nalishi Pedagogika va sport bilim sohasining jismoniy tarbiya va sport faoliyatiga mansub yo‘nalishi bo‘lib, umumiy o‘rta, o‘rta maxsus va professional ta’lim muassasalari, maktabdan tashqari ta’lim tashkilotlari, sport muassasalari hamda davlat va nodavlat ta’lim tizimi subyektlarida pedagogik, tashkiliy va ilmiy-tadqiqot faoliyatini amalga oshirishni qamrab oladi. Ushbu yo‘nalish jismoniy tarbiya va sport mashg‘ulotlarini tashkil etish, sog‘lom turmush tarzini shakllantirish, ta’lim oluvchilarning jismoniy rivojlanishini ta’minlash, pedagogik va axborot texnologiyalaridan foydalanish, shuningdek ta’lim jarayonini boshqarish va takomillashtirishga yo‘naltirilgan inson faoliyatining vositalari, usullari, metodlari va uslublari majmuasini o‘z ichiga oladi.

Jismoniy madaniyat ta’lim yo‘nalishi bo‘yicha bakalavrlar kunduzgi, kechki va sirtqi ta’lim shakllarida tayyorlanadi. Kunduzgi ta’lim shaklida o‘qish muddati 3 yilni tashkil etadi. Ushbu ta’lim yo‘nalishi jismoniy tarbiya va sport sohasida zamonaviy bilim, ko‘nikma va kompetensiyalarga ega, raqobatbardosh pedagog kadrlarni tayyorlashga qaratilgan.

Ta’lim jarayonida talabalar jismoniy tarbiya mashg‘ulotlarini rejalashtirish va tashkil etish, sog‘lom turmush tarzini targ‘ib qilish, o‘quvchilarning jismoniy rivojlanishini baholash hamda innovatsion pedagogik va axborot texnologiyalaridan samarali foydalanish bo‘yicha bilimlarga ega bo‘ladilar.

Yo‘nalish bitiruvchilari umumiy o‘rta, o‘rta maxsus va professional ta’lim muassasalarida jismoniy tarbiya o‘qituvchisi, maktabdan tashqari ta’lim muassasalarida to‘garak rahbari, shuningdek ta’lim tizimida tashkiliy-boshqaruv lavozimlarida faoliyat yuritish imkoniyatiga ega bo‘ladilar.